Serbska kulturna informacija Budyšin

Pytaće za nowym dźěłom z wotměnjawymi nadawkami?

To mamy: informowanje a předawanje w SKI, na wikach po cyłym kraju abo na wšelakich zarjadowanjach, kaž tež dźěło za ličakom! Zhromadnje w nazhonitym a wjesołym teamje!

Pytamy koleginu/kolegu (m, ž, d), kiž nas dźělnje (hač do 30 h/tydźeń) při našim mnohostronskim dźěle podpěra. Městno chcemy wot 1. junija 2026 wobsadźić.

 Što słuša do Wašich nadawkow?

• informowanje wopytowarjow a wobdźěłanje naprašowanjow (wosobinsce a online)
• hladanje internetowych poskitkow SKI (online-shop, kulturna protyčka)
• wobdźěłanje skazankow
• dźěło z kasowym systemom, nakup a předań tworow
• prezenca na regionalnych a swójskich zarjadowanjach

Što sebi wot Was přejemy?

• přećelny a wotewrjeny wobchad z hosćimi a kupcami
• kreatiwnosć, samostatnosć a organizatoriske kmanosće
• wobknježenje serbskeje rěče w słowje a pismje
• znajomosće we wobchadźe z kompjuterom
• nazhonjenja na polu marketinga a turizma bychu byli idealne
• znajomosće jendźelšćiny abo/a słowjanskich rěčow bychu byli hišće lěpje
• zwólniwosć k dźěłu, tež hdys a hdys kónc tydźenja

Što Wam skićimy?

Skićimy Wam wotměnjawe nadawki a wobšěrne zawjedźenje do noweho skutkowanja. Dźěłowy čas wučinja hač do 30 hodźin wob tydźeń. W ramiku wotewrjenskich časow móžeće sej tutón fleksibelnje zarjadować.
Mzdu płaćimy po tarifje TV-L, wotwisnje wot wukubłanja hač do EG8.
Prawidłowny poskitk dalekubłanjow je samozrozumliwy, runje tak starobne zawěsćenje a druhe lěpšiny zjawneje słužby.

Dźěłowe městno je w Budyšinje.

Wjeselimy so na Waše požadanje hač do  20. meje 2026 digitalnje na personal@zalozba.de abo z póštu na Załožba za serbski lud, Póstowe naměsto 2, 02625 Budyšin.

Maće-li prašenja, zazwońće rady na Wašich přichodnych koleginow pod 03591 550 111.