Lěto Zejlerja a Kocora 2022

z 30 zarjadowanjemi a 340 spěwarjemi z cyłeje Łužicy jako wjeršk

Składnostnje 200. narodnin Korle Awgusta Kocora (* 3.12.1822) a 150. posmjertnin Handrija Zejlerja († 15.10.1872) je Domowina 2022 k lětu Zejlerja a Kocora wuwowała. W tutym lěće so něhdźe 30 zarjadowanjow a akcijow wotměje, z kotrymiž dopomina so na skutkowanje a kulturne herbstwo tuteju wusahowaceju wosobinow našich stawiznow.

Najznaćiša twórba dołheho wunošneho zhromadneho dźěła a přećelstwa mjez basnikom Zejlerjom a komponistom Kocorom bě zjawna premjera spěwa „Rjana Łužica“ na prěnim serbskim spěwanskim swjedźenju 1845 w Budyšinje. W lětach po swjedźenju bywaše spěw dale a woblubowaniši a sta so tak ze serbskej hymnu. Wučer a etnograf Hendrich Jordan tekst pozdźišo do delnjoserbšćiny přełoži a spisowaćel Kito Lorenc přebasni jón do němskeje rěče.

K tomu wuńdźe nowa CDka, na kotrejž předstaja so serbska hymna w hornjoserbskej, delnjoserbskej a němskej wersiji. Nahrawało je so nowe wobdźěłanje Oksany Weingardt za mały komorny orchester ze studentami Drježdźanskeje Wysokeje šule za hudźbu “Carl Maria von Weber” a dalšimi hudźbnikami.  Cdka móže so w našim wobchodźe skazać.

Zarjadowanja

Wjeršk „Lěta Zejlerja a Kocora“ dnja 29.10.2022 w Budyskej Krónje budźe na prěni serbski spěwanski swjedźeń nawjazować. Hižo 340 spěwarkow a spěwarjow z cyłeje Łužicy je so na tute zarjadowanje přizjewiło. A zajimowany publikum móže zarjadowanje přez livestream sobu dožiwić.

Dalše zarjadowanja budu n.př. Nalětni koncert chóra LIPA, 76. Serbski cyrkwinski dźeń w Bukecach z wšelakimi zarjadowanjemi, předstajenje oratorija “Podlěćo” z chórami Lubijskeje eforije, spěwny wječor z Wólbernosćemi, komorny hudźbny wječor z kompozicijemi K. A. Kocora,  předstajenje oratorija “Israelowa zrudoba a tróšt” a wjele dalšich. Zarjadowanja namakaće na stronach Domowiny a tež w našej serbskej protyce, woznamjenjene z logom lěta Zejlerja a Kocora.